وقتها كنت خلاص عرفت اعلم نفسي شوية أساسيات في تصميم الجرافيك لأغراض تجارية من يوتيوب وفكرت إيدي ازاي بنستخدم البرمجيات عشان تعمل اللي في دماغنا وقلت ادور على كورسات اكاديمية بقى تظبط معايا وتحسن مستوى شغلي والتصاميم اللي بعملها.
لقيت بالفعل كذا كورس كويسين بس كانت المشكلة انهم غاليين أوي والحقيقة أحبطت شوية لكن بعدها قعدت ادور تاني لحد ما عرفت ان في منصات بتقدم دعم مالي بثمن الكورس اللي بيقدموه فقعدت ادور لحد ما عرفت اسئلة طلبات الدعم و يجاوبوا عليها ازاي، قولت هجرب في كورس كتابة محتوى تسويقي مدته ساعتين كده ونشوف وافقوا وفقوا موافقوش خلاص وجالي الرد بعد 14 يوم انه تمام يلا الدعم اتقبل فبدأت الكورس وخلصته وقولت يلا بقى نجرب في كورس التصميم وبعت طلب الدعم وفضلت مستنية ردهم عشان ابدأ الكورس لحد ما جه فعلاً بالموافقة وبدأت.
الكورس كان من معهد كاليفورنيا للفنون قائم تقريباً على مزيج من شرح واحد من المختصين في المعهد والطلبة بتوعه، الأسبوع الأول كان شرح للصور وازاى ممكن نخلق صور دلالية تعبرعن شئ ما من خلال العنصر الأساسي في الصورة بعد ما خلصنا كان الإختبار اننا نخلق كام صورة لعنصر ما من اختيارنا ونكون به صوره.
الحقيقة وقتها ماكنتش عارفة اختار عنصر وفضلت محتاسة بحاول اوصل لعنصر مناسب، قبلها بكام يوم كنت قابلت أحد الأصدقاء المقربين ماكناش اتقابلنا من فترة كان من ضمن كلامنا بعد الأحضان والإطمئنان وتبادل التفاصيل عن آخر الأحداث في حياتنا جت سيرة فترة في حياتنا كنا أدمنا فيها واحد من المسكنات الأفيونية في فترة كنا لسه بنكافح فيها عشان نلاقي شغل ولما لقينا كانت شغلة قايمة على المجهود البدني والاحتكاك المباشر مع عدد كبير من الناس واللي كان الحقيقة أصعب من المجهود البدني بشكل خلى رجلنا تغرز أكثر في حفرة المسكن اللعين ده لكننا قدرنا نخرج من الحفرة دي سوا زي ما دخلناها سوا وعرفنا نبطل.
تذكر مقابلة صديقي دي وكلامنا كان بمثابة النجدة بالنسبة لي بالنسبة لي وقررت ساعتها اني هختار علبة البرشام أو الأقراص وفعلاً بدأت وعملت الصور دي والحقيقية كان أول وآخر أختبار اعمله في الكورس ده لأني قررت اني مش هكمله مش كسلاً منى او عشان الكورس مش مفيد زي ما ممكن البعض يفكروا بس مع تقدم المستويات ما بقيتش قادرة اتحمل الصورة اللى بيعرضها الكورس ده للحياة الدراسية اللي عند البيض سواء في اماكن التعليم او اساليبه او تعامل المختصين مع الناس اللى بيتعلموا الحقيقة ما قدرتش اتعامل مع احساسي بالسخط وانه خلاص بقى يا ولاد الوىىىخة ده انتوا عالم أول جداً..
من كام يوم كان عيد ميلاد صديقي، اتقابلنا تاني بعد غياب طويل قعدتنا كانت زي قعدات زمان ولبضع ساعات حسيت اننا رجعنا بالزمن سوا لوقت ما كنا أقرب وكأن مفيش حاجة في حد فينا اتغيرت ولا اختلفت حيواتنا وبقت اكثر تعقيد.
لصديقي ولكل من لا صديق لهمن ولمن رحل عنهمن الأصدقاء ولنفسي قررت اشارك ده
